He kaimahi
“Ehara taku toa i toa takitahi, engari he toa takitini”
‘Ko te ārahi mā te kawe tonu i te mahi’: he āta mahi tahi ki ngā hoamahi e nui ake ai tō rātou āhei ki te whakatutuki haere i ngā whāinga a te kura
Ko tā te kaitātaki i roto i tana tū hei kaimahi, he whakaatu i te pukumahi, he whakatauira i te aro nui, i te whakapaunga kaha nui kia tutuki ngā whāinga a te kura. Me tangata pūmanawa rau, me ringa rehe e āhei ai tana kawe ake i te rau o ngā mahi, e puta ai he painga taha ako, taha tupu ki ngā ākonga. Ko te ‘ārahi mā te kawe ake i te mahi’, ko te ‘mahi ā-ringa’ ētahi mea nui o tēnei tūranga, e mōhio wheako ai te kaitātaki ki te āhua o ngā mahi katoa e kawea ana i te kura, ā, ka noho ko tēnei mōhio ōna ki te ārahi i ana whakatau.
Me whakaae te kaimahi kia uru ia ki ngā momo mahi katoa e tika ana kia mahia. Waihoki, me mōhio, me whakanui anō te kaimahi i ngā mahi e kawea ana e ētahi atu.
|
| Arotahinga matua: te mana mokopuna
|
|---|
| Whāinga: Kia mahi i te taha o ngā ākonga kia tino whaihua ai tā rātou ako Kawenga kaitātaki:
- ko te mahi i te taha o ngā ākonga, ka aroturuki i ngā mahi e tutuki ana i a rātou, ō rātou whanonga me te kimi mai he aha ō rātou hiahia
- ko te āta whai wāhi atu ki ngā kawenga maha o te kura, me te whakatakoto ara e noho tahi ai, e mōhio ake ai koe ki ngā ākonga
- ko te whakatō i te whakaaro kei te hoe tahi ngā kaimahi katoa, ngā ākonga katoa, ngā whānau katoa i runga i te whakaaro kotahi, arā, kia puta he painga mātauranga e uaratia ana ki ngā ākonga
|
| Arotahinga matua: te mana wairua
|
|---|
| Whāinga: Kia mahi i te taha o ngā ākonga, ngā kaimahi me ngā whānau ki te hāpai i tō rātou hauora, tō rātou haumaru me tō rātou oranga whānui Kawenga kaitātaki:
- ko te poipoi i ngā hononga ki ngā ākonga, ngā kaimahi me ngā whānau o te kura ki te tautoko, ki te whakatairanga i ngā tikanga hauora, haumaru e noho ora ai rātou
|
| Arotahinga matua: te mana tangata
|
|---|
| Whāinga: Kia mahi i te taha o ētahi atu hei hoamahi tonu nō rātou, me te uara i te mahi e kawea e tēnā, e tēnā i te kura Kawenga kaitātaki:
- ko te whai kia pai ngā whakaaro o ētahi atu ki a koe, mā te mahi i te taha o ngā kaimahi, mā te mahi tahi anō ki a rātou, hei hoamahi noa, hei kaipoipoi, hei kaiārahi rānei
- ko te kite, ko te whakamihi i ngā mahi e kawea ana e ētahi atu, mā te uru rawa ki aua mahi
- ko te akiaki i ngā kaimahi i ōna wā anō ki te whakamātau i ngā mea hou ahakoa he uauatanga anō pea kei roto, ā, ki te uru anō ki ngā whakawhiti kōrero ngaio ko te ako te kaupapa
|
| Arotahinga matua: te mana reo
|
|---|
| Whāinga: Kia pakari ake te matatau o ngā kaimahi ki te reo Māori Kawenga kaitātaki:
- ko te tautohu i te kaha o te reo Māori o ngā kaimahi, me te whakarite mahere e kaha ake ai, kia pai ai tā rātou tautoko, tā rātou whakawhānui atu i ngā pükenga reo Māori o ā rātou ākonga ki ngā kaupapa maha
|
| Arotahinga matua: te mana tikanga
|
|---|
| Whāinga: Kia mahi tahi ki ētahi atu i runga i te whai kia hāpaitia, kia uaratia anō ngā tikanga Māori i te kura Kawenga kaitātaki:
- ko te mahi i te taha o ētahi atu ki te whiriwhiri me pēhea te kōkuhu atu i ngā tikanga ki ngā mahi huri noa i te kura
- ko te akiaki kia whai wāhi mai, kia whai kupu mai ētahi atu, kia oti ai ngā whakatau mō ngā tikanga i runga i te whakaae a te nuinga
- ko te whakatītina i te kura kia whakapau kaha te katoa ki te hāpai ake i ngā tikanga Māori i roto i ngā kawenga katoa o te kura
|
| Arotahinga matua: te mana mātauranga
|
|---|
| Whāinga: Kia mahi tahi ki ngā whānau o te kura me te iwi ki te whakatairanga i te mātauranga Māori i roto i ngā mahi whakaako me ngā mahi ako Kawenga kaitātaki:
- ko te mahi tahi ki ngā whānau o te kura me te iwi ki te whakatinana i te mātauranga Māori i roto i ngā kaupapa whakaako me ngā kaupapa ako
- ko te whakatenatena i ngā whānau o te kura me te iwi ki te tautoko i te kura, mā te hāpai ake i ngā tikanga, te reo me te mātauranga Māori
|
| Arotahinga matua: te mana ā-kura
|
|---|
| Whāinga: Kia mahi tahi ki ngā kaiako ki te whakatutuki i ngā hiahia tōmua, ngā whāinga me ngā wawata o te kura Kawenga kaitātaki:
- ko te akiaki i ngā tāngata katoa e whai pānga mai ana ki te kura ki te whakapau kaha ki ngā hiahia tōmua, ngā whāinga me ngā wawata o te kura
- ko te whakatītina i te katoa kia kawe tahi, kia ngākaunui tahi ki ngā whāinga a te kura
- ko te tautoko i ngā kaiako ki te whakatinana haere i ngā hiahia tōmua, ngā whāinga me ngā wawata
- ko te mahi i te taha o ngā kaiako ki te tautohu i ngā wāhi e kaha ana, e ngoikore ana tēnā me tēnā o rātou, ka mahi i ētahi whakatikatika e puta ai he painga ki ngā ākonga
|
Tell a colleague |
Back to top
