He whakamihi
Kei te mihi ake Te Tāhuhu o te Mātauranga ki ngā tumuaki, ki ngā māngai o te ao rapu mātauranga, ki ngā whakahaere, ki ngā kaitohutohu, ki ngā kairangahau anō hoki e mahi ana i roto i te mātauranga kaupapa Māori, mō koutou i whai wāhi mai ki te tārainga o tēnei tuhinga, a Tū Rangatira. Me kore ake ngā hāora i whakawāteatia mai e koutou ki tēnei kaupapa, ō koutou whakaaro hōhonu, tō koutou aroha nui ki te kaupapa, me ā koutou āwhina katoa atu.
Inā ko te kaitiaki, ko te kaiwhakarite,
Ko te kanohi matara, ko te kaiako,
Ko te kaimahi, ko te kaikōtuitui,
Ko te kaiarataki,
Inā ia, te tū rangatira e!
