He kaikōtuitui

“Kotahi te kōhao o te ngira e kuhuna ai te miro mā, te miro pango, te miro whero”

He tuitui, he poipoi taura tangata, he taka i waenga i ngā rōpū, e tutuki haere ai ngā whāinga a te kura

Ko tā te kaikōtuitui, he mahi tahi ki ngā rōpū mātāmua e whai pānga mai ana ki te kura, ko te taka i waenga i ētahi, ko te āta whiri i ngā taura tangata e puta ai he whakaaetanga whānui ki ētahi kaupapa, e tautokona ai ngā kaupapa e kawea ana e te kura. Me āhei te kaikōtuitui ki te kōrero i ngā painga o ngā whāinga a te kura, me te tuitui i ngā wheako me ngā tohungatanga e ea ai aua whāinga. Ko tētahi mea nui o tāna mahi, he poipoi i te matahuhuatanga, me te whakanui anō i te noho ahurei o te kura i puta ake ai i tēnei matahuhuatanga. Kei te kaikōtuitui anō te kawenga ki te whiri, ki te morimori i ngā hononga torokaha e arotahi ana ki te pakari haere o ngā ākonga me te puta o ō rātou ihu i ngā mahi rapu mātauranga.

Arotahinga matua: te mana mokopuna

Whāinga: Kia arahina ngā whānau o te kura ki te mahi tahi, e eke ai tēnā me tēnā ākonga ki te tino taumata ako e taea ana e ia

Kawenga kaitātaki:

  • ko te whakatenatena i ngā whānau kia tū hei kaiwhāngai i te mātauranga ki ngā tamariki i waho o te kura
  • ko te mahi kia āhua rite te hā o ngā kōrero e whakapuakina ana mō te rapu mātauranga, kia kaua e taupatupatu tētahi ki tētahi, i roto, i waho anō o te kura
  • ko te whakatenatena kia hoe tahi te katoa e eke ai tēnā ākonga, tēnā ākonga ki te tino taumata e taea ana e ia

Arotahinga matua: te mana wairua

Whāinga: Kia tautohua ngā kawenga, ngā whanonga me ngā tikanga Māori papai katoa e hāpaitia ai te hauora me te oranga whānui o ngā ākonga, ngā kaimahi me ngā whānau o te kura

Kawenga kaitātaki:

  • ko te whakatinana i ngā tikanga Māori me te ū ki ngā kawenga, ki ngā whanonga e mōhiotia ana, e paingia ana e te katoa

Arotahinga matua: te mana tangata

Whāinga: Kia āta kōrerotia ngā painga, ngā whāinga, ngā aha ake o te kura ki ētahi atu, me te whiri i ngā taura ki te hapori ako, te mana whenua me ērā atu rōpū e whai pānga mai ana, mō te kura tonu te painga

Kawenga kaitātaki:

  • ko te kōrero mō ngā painga, ngā aha atu o te kura, me te whakaatu i ngā whāinga a te kura ina whiria ngā taura ki te hapori whānui ake
  • ko te whiri i ngā taura ki te maha atu o ngā rōpū whai pānga mai ki te kura, hei tautoko i te tirohanga whānui me ngā whāinga a te kura
  • ko te whakanui i te wāhi ki te mana whenua hei kaitiaki o te rohe
  • ko te whai i ngā mahi, i ngā ara e torokaha ai ngā taura ka whiria ki ngā rōpū o waho e whai pānga mai ana ki ngā mahi o te kura

Arotahinga matua: te mana reo

Whāinga: Kia whakanuitia ngā kōrero taketake o te mana whenua

Kawenga kaitātaki:

  • ko te hāpai, ko te whakanui i ngā kōrero taketake o te mana whenua, mā te whakanoho mai hei wāhanga o ngā kaupapa e whakahaeretia ana e te kura

Arotahinga matua: te mana tikanga

Whāinga: Kia whakanuitia te wāhi ki ngā tikanga a te mana whenua i roto i te kura

Kawenga kaitātaki:

  • ko te hāpai, ko te whakanui i ngā tikanga a te mana whenua
  • ko te kōrero tahi, ko te mahi tahi ki te iwi me ngā whānau o te kura kia mōhiotia ai, kia whakanuitia ai ā rātou ake whāinga, ō rātou ake wawata mō ā rātou tamariki, mokopuna

Arotahinga matua: te mana mātauranga

Whāinga: Kia whakaemitia ngā tautoko me ngā āwhina mai i te hunga e pūkenga ana ki te mātauranga Māori

Kawenga kaitātaki:

  • ko te kōtuitui haere, ko te mahi tahi ki ētahi atu ki te whakatinana i ngā whāinga a te kura
  • ko te kimi i ngā tautoko, i ngā āwhina a te hunga e tohunga ana ki tēnei mea, te mātauranga Māori
  • ko te kōrero tahi ki te iwi, ki ngā pakeke mō te mātauranga Māori, me te whai kia uru mai rātou hei kaitohutohu, hei kaikōrero, hei kaipupuri kōrero, hei kaiwhakarite kaupapa, hei aha atu rānei
  • ko te kohikohi i ngā kōrero mō te mātauranga Māori mai i ngā puna taketake maha tonu

Arotahinga matua: te mana ā-kura

Whāinga: Kia whakaemitia he tautoko mō te marau ā-kura mai i ngā ākonga, ngā kaimahi me ngā whānau

Kawenga kaitātaki:

  • ko te tuitui i te tini tāngata e pai ai tā rātou tautoko i ngā kaupapa mā ngā whānau o te kura
  • ko te whakatakoto huarahi e whai wāhi mai ai ngā ākonga, ngā kaimahi me ngā whānau ki te tārainga me te whakatinanatanga o ngā kaupapa
  • ko te akiaki kia uru mārire ēnei rōpū ki ngā mahi whakatakoto whāinga mā te kura
  • ko te whakatītina i te katoa kia kawe tahi, kia ngākaunui tahi ki te whakatutuki haere i ngā whāinga a te kura

Tell a colleague | Back to top